كان يمكن نكون اسم لشي وهْم
نغفل الديوانة ونَصْدق في الأندلس
مستور في الكتوبة
وشاد زهرة الغنباز نبتت في سوس و اروات في الريف
ونحطها – إيلا نْجيت – بين يديك
ونهرب حشمان منك
حادر عيني وخا عليهم عْصابة السؤال
لكن حالف مانبقى كاين إلا بك
حتى إيلا محيتيني نبقى ظلك .
………….
كان يمكن نكون جملة في رسالة ونحرﭭـ
تطير الطيارة وتجيب احماقي لك
يا تدفْـنيه … يا تخبّيه …. يا ترميه في ” والو “
تخليه يعلموه الصوفية ” جلال الفراغ “
وكيف يكون في مايكونش
احنى الراس واهرب يحلم
وما بغاش يصحى منك .
…………..
كان يمكن ” المتوسط ” يعلم الحروف كيف ترقص تحت اقدامك
باش تحلقي نور يهدي مركبي لك
سارح في حلمي وانت جيتي سحر في الغيبة
منارة وانا بحار تايه
عَلّي نورك راني جثة بالحياة مساعفة
مدي صوتك يفيَّق فيَّ احماق خافية باش نكون كي حكمتِ .
…………….
كان يمكن … ويمكن غادي يكون
انت عارفة وانا قريب نعرف
احرافت طريقي لك
واعترت في بابك
النور سياج المكان
والحلم تدّاكر مع الخَيال
وقالو : خليها على الله
نسيت ظلي – كـنْجَر فيه
يتعلم يرسى
كنشوف وبقيت واقف كـنشوف ونحلم
(ماشي مشكل إيلا وليت اعمى )
…………..
كان يمكن اللغز يبقى
يبقى للقصيدة هبالها
نتوهم أن دفايَ في الكتبة وحماقي في خيالها
كيف نسافر من الورقة للإنسان
وكيف نسافر من الإنسان للورقة
وتسمعي ظلي ينشد : تنبغيك
تنبغيك
ونقول أنا : كان يا ماكان .
ـــــــــــــــــــــــــــــــــــــــــــــــــــــــــــــــ
